Thursday 20 October 2011

కొన్ని తెలుగు బూతులు-ఒక పరిశీలన




రోజూ సోనా మసూరి తినేవాళ్లు నెలకోమారు రాగిసంగటి తినాలనుకోవచ్చు.  ఇన్నాళ్లూ సంగటితో బతికిన వాళ్లు సోనామసూరి తినాలని ఆశపడొచ్చు. ఒకటి సరదా....తలకాయ కూరతోనో పల్లీల చట్నీతోనో భేషుగ్గా అనిపించే జిహ్వ చాపల్యం. ఒక్క ముక్కలో ఫాన్సీ. ఇంకొకటి...అన్నిమాటల్లేవు. ఒకటేమాట. జీవితం. మేం ఇంత కష్టపడి సూపర్‌మార్కెట్‌లో రాగిపిండి కొనుక్కుని  ముచ్చట పడి మరీ  సంగటి తింటుంటే మీరా అనారోగ్యకారకమైన సోనా మసూరికోసం ఎందుకు ప్రయత్నిస్తున్నారని ఫాన్సీగాడు జీవితంగాడికి బోధిస్తే ఏమంటాం? దీన్ని అచ్చతెలుగులో బూతు అంటారు. మరి, ఇంగ్లిష్ రెక్కలు తొడుక్కుని అమెరికాకు ఎగిరిపోయిన వారు ఇక్కడి తెలుగు వాళ్లకు మాతృభాష గురించి పాఠాలు చెప్పడాన్ని ఏమనాలి? అదీ ఇసయం! ఈ మద్దెన తానా తందానా..ఆటా పాటా, సిలికానాంధ్ర-సెలైనాంధ్ర ఏది చూసినా తెలుగు ముచ్చట్లే. మాంచిగా పట్టు ధోవతులు, పట్టు పరికిణీలు కట్టి మరీ తెలుగుదేశంలో తెలుగేమైపోతున్నది అని బాధపడుతున్నారు. ఖండాంతరాలు దాటి ఇంత దూరం వచ్చినా తాము ఇంతగా మాతృభాష కోసం ప్రాకులాడుతుంటే తెలుగుదేశంలో ఉండి తెలుగును మర్చిపోతారా అని ఆవేశం, ఆవేదన, ఆక్రోశం ఇత్యాది అకారాదిభావాలనేకం  గొంతులోనూ ముఖంలోనూ పలికిస్తున్నారు. ఈ ఇంగ్లిష్‌ వ్యామోహమేమిటి? అని నిగ్గదీసి నిలదీసేస్తున్నారు. గుడ్డు..వెరీ గుడ్డు..వెరీ వెరీ గుడ్డు. నాలుగింగిలిపీసు ముక్కలు నేర్చుకుంటే మెరుగైన అన్నం తినొచ్చని మెరుగైన బండిలో తిరగొచ్చని మెరుగైన దేశంలో ఉండొచ్చని ఇంకా ఇలాంటి మెరుగుల కోసమే కదా దొరలూ మీరు సముద్రం దాటేసింది. మరి ఆ మెరుగులు మాకొద్దా! మీకు అవసరమైపోయింది మా దగ్గరికొచ్చేసరికి పనికిమాలినదైపోయిందా సార్లూ! ఎగిరిపోతే ఎంత బాగుంటుందీ అని మీరు పాడితే కర్ణపేయంగానూ మేం పాడితే కర్ణ కఠోరంగానూ ఉంటుందా దొరలూ? మంచి ఎవరు చెప్పినా మంచే కదా...మెరుగైన జీవితం కోసమని మన మాతృభాషను కించపరిచే ధోరణులు తగునా..ఇపుడు నడుస్తున్న పోకడలు సమంజసమైనవా అని పెద్దలు గంభీర్‌కే రూప్‌మే ప్రశ్నించవచ్చును. లెస్సయిన ప్రశ్నలే. కానీ మంచి చెడులు సైతం స్థలకాలాతీతములు కాలేవు. ఆంగ్లంలోనే అన్నీ ఉన్నాయిష అనేవాడిని సిగపాయ తీసి తందుమా లేదా అనేది మనం మనం తేల్చుకుందాం. మన తిప్పలేవో మనం పడదాం. కానీ వలసపక్షులకు దారిచూపిన వారు ఇంగ్లిష్‌ వ్యామోహం ఇంతగా పెరిగిపోవడానికి ఉత్ప్రేరకులైన వారు మనకు ఉల్టా నీతులు చెపితే మాత్రం ఎక్కడో కాలుద్ది. కాలకపోతే మనలో ఏదో లోపమున్నట్టే లెక్క. నాలుగు డబ్బులున్నోడు ఏం కూసినా ఎగబడి చూసే రోగం ధనమంత పురాతనమైనది. వారసత్వ సామాజిక వ్యాధియని చరిత్ర చెప్పుచున్నది.  చెప్పువాడు కుబేరుడైతే ఎగబడి చూచువాడిని తెలుగులో బానిస అంటారు. దూరం పోయినంత మాత్రాన మాతృభాషమీద ప్రేమ యుండకూడదా? ఉండవచ్చును.  దూరమైన దానిపట్ల ప్రేమ ఎక్కువగానే యుండవచ్చును. ముగ్గులు, పిడకలు, కీర్తనలు, గొబ్బెమ్మలు, ఇత్యాది దినుసులతో తెలుగు సంస్కృతిని కాపాడుకుంటున్నామనుకోవచ్చును. సాఫ్టువేరులు, హర్డువేరులు రూపొందించవచ్చును. సంతోషం. సంవ్సతరానికి ఒకసారి ఆ ప్రేమను చాటుకోవడానికి పంచెలు, ఓణీలతో ఉత్సవాలు చేసుకోవచ్చును. తెలుగుదేశం నుంచి సినిమా బాబుగార్లను హిందీ తారలను పిలిపించుకుని డాన్సులవీ వేసి ముచ్చట తీర్చుకోవచ్చును. ఆ పక్కనే ఏ శోభారాజ్‌నో పిలిపించుకుని అన్నమయ్య కీర్తనలూ పాడించుకోవచ్చును. తప్పులేదు. ఇంగ్లిష్‌ జీవితంలో ఉన్నవారు ఒకరోజు తెలుగు ఉత్సవం చేసుకుంటే ఎందుకు తప్పు పడతాం! కానీ తెలుగు జీవితంలో ఉన్నవారికి తెలుగు పాఠాలు చెప్పే దుస్సాహసానికి పాల్పడితే మాత్రం బాగోదు. ఇపుడూ, నువ్వు పట్నవాసపు ఏసిరూముల్లో బతుకుతూ పల్లెల్లో నక్షత్రాలు, వెన్నెల ఎంతబాగుంటాయో అని వగచవచ్చు. పెరట్లో కొబ్బరాకుల మాటున చంద్రున్ని చూస్తూ నులకమంచంపై పడుకోవండలో ఉన్న ఆనందం గురించి కూడా సినిమా లెవల్లో కబుర్లాడుకోవచ్చు. ఎన్నైనా అనుకోవచ్చు. మనకు దక్కని వెన్నెలతో మంచిగాలితో పల్లెజనం ఎంత సుఖపడిపోతున్నారో అని బాధపడిపోవచ్చు. తప్పేమీ లేదు. కానీ మేం వెన్నెల గురించి ఆలోచిస్తుంటే మీరు ఫ్యాన్లు, ఎసిల కోసం పాకులాడడమేమిట్రా అని వారికి పాఠాలు మాత్రం చెప్పరాదు. మిక్సీలు, గ్రైండర్ల కంటే రోటి పచ్చడి బెటరని నువ్వనుకోవచ్చు. అందుకు పెళ్లాలను రాచిరంపాన పెట్టొచ్చు. కానీ మేమే రోటి పచ్చళ్లవైపు చూస్తుంటే నువ్వు మిక్సీలు కొంటున్నావేంట్రా సుబ్బాయ్‌ అని సుమతి అవతారమెత్తకూడదు. నువ్వు ఇంటిపక్కనే ఉన్న సూపర్‌ మార్కెట్‌కు  కూడా బైకో కారో వేసుకుని వెళ్లవచ్చు. కానీ  "అప్పట్లో కాలేజీకి ఐదారుకిలోమీటర్లు నడిచిపోయేవాళ్లం..ఇపుడు కిలోమీటర్‌ నడిచేవాడు లేడు. అన్నింటికీ ఆటోనో బస్సో కావాల్సిందే..పల్లెలు కూడా సోమరితనం నేర్చుకున్నాయి..ప్చ్‌ పాడైపోయాయి..." అనకూడదు.  ఆదిలోనే చెప్పుకున్నట్టు దాన్ని బూతు అంటారు. కొన్ని ప్రాంతాల్లో బలుపు అని కూడా వ్యవహరించడం కద్దు. తన్నుమాలిన దర్మసూత్రములు వల్లించువారిని నోటికి చేతికి పొంతనలేని వారిని అలా వ్యవహరించడమే మర్యాద, పద్ధతీను. మన తెల్లదొరలు అతీతులేమీ కాదు. కనీసం వెస్ట్రన్ లెక్కల్లో అయినా యు ఓకే..ఐ ఓకే అనన్నా అనుకోవాలి. ఐ ఓకే..యు నాట్‌ అంటే ఏమనాలి? అహా! ఏమనాలి అంట! ఏమంటాం? ఇంగ్లిష్‌ దేశంలో ఉన్నారు కదా!..ఏసు క్రీస్తు మాటలనే చెప్పుకుందాం. అయ్యలారా!..అమ్మలారా! మాకోసం ఏడవకండి..మీ కోసం..మీ పిల్లల కోసం ఏడవండి..ఆమెన్‌!
                                                                                                                                     జి ఎస్‌ రామ్మోహన్‌


                                                                                                               

5 comments:

  1. ఇరగతీసారండి రామ్మోహన్ గారు. ముగింపులో అంబపలికింది.

    ReplyDelete
    Replies
    1. ముగింపులో అంబపలికింది.

      Delete
  2. చాల బాగుంది రామ్మోహన్

    ReplyDelete
  3. I never understood , why a converted christians like Ram Mohan never change their Hindu names, when they converted in to christianity they must have got a christian name, but people like Ram Mohan still keeps their Hindu names to fool people, please change your Hindu names in to Christian names and express your views and spread poison against Hindu Religion as per your Christian guidelines

    ReplyDelete
  4. If you see religion in this post you require some psychiatry help..

    ReplyDelete